శ్రీవిష్ణుమహిమ్నఃస్తోత్రమ్
శ్రీ గణేశాయ నమః ।
మహిమ్నస్తే పారం విధిహరఫణీన్ద్రప్రభృతయో
విదుర్నాద్యప్యజ్ఞశ్చలమతిరహో నాథ ను కథమ్ ।
విజానీయామద్ధా నలిననయనాత్మీయవచసో
విశుద్ధ్యై వక్ష్యామీషదపి తు తథాపి స్వమతితః ॥ ౧॥
యదాహుర్బ్రహ్మైకే పురుషమితరే కర్మ చ
పరేఽపరే బుద్ధం చాన్యే శివమపి చ ధాతారమపరే ।
తథా శక్తిం కేచిద్గణపతిముతార్కం చ
సుధియో మతీనాం వై భేదాత్త్వమసి తదశేషం మమ మతిః ॥ ౨॥
శివః పాదామ్భస్తే శిరసి ధృతవానాదరయుతం
తథా శక్తిశ్చాసౌ తవ తనుజతేజోమయతనుః ।
దినేశం చైవాముం తవ నయనమూచుస్తు నియమాస్త్వదన్యః
కో ధ్యేయో జగతి కిల దేవో వద విభో ॥ ౩॥
క్వచిన్మత్స్యః కూర్మః క్వచిదపి వరాహో నరహరిః
క్వచిత్ఖర్వో రామో దశరథసుతో నన్దతనయః ।
క్వచిద్బుద్ధః కల్కిర్విహరసి కుభారాపహృతయే
స్వతన్త్రోఽజో నిత్యో విభురపి తవాక్రీడనమిదమ్ ॥ ౪॥
హృతామ్నాయేనోక్తం స్తవనవరమాకర్ణ్య విధినా
ద్రుతం మాత్స్యం ధృత్వా వపురజరశఙ్ఖాసురమథో ।
క్షయం నీత్వా మృత్యోర్నిగమగణముద్ధృత్య జలధేరశేషం
సఙ్గుప్తం జగదపి చ వేదైకశరణమ్ ॥ ౫॥
నిమజ్జన్తం వార్ధౌ నగవరముపాలోక్య
సహసా హితార్థం దేవానాం కమఠవపుషాఽఽవిశ్య గహనమ్ ।
పయోరాశిం పృష్ఠే తమజిత సలీలం ఘృతవతో
జగద్ధాతుస్తేఽభూత్కిము సులభభారాయ గిరికః ॥ ౬॥
హిరణ్యాక్షః క్షోణీమవిశదసురో నక్రనిలయం
సమాదాయామర్త్యైః కమలజుముఖైరమ్బరగతైః ।
స్తుతేనానన్తాత్మన్నచిరమవభాతి స్మ
విఘృతా త్వయా దంష్ట్రాగ్రేఽసావవనిరఖిలా కన్దుక ఇవ ॥ ౭॥
హరిః క్వాస్తీత్యుక్తే దనుజపతినాఽఽపూర్య
నిఖిలం జగన్నాదైః స్తమ్భాన్నరహరిశరీరేణ కరజైః ।
సముత్పత్యాశూరావసురవరమాదారితవతస్తవాఖ్యాతా
భూమన్కిము జగతి నో సర్వగతతా ॥ ౮॥
విలోక్యాజం ద్వార్గం కపటలఘుకాయం సురరిపుర్నిషిద్ధోఽపి
ప్రాదాదసురగురుణాత్మీయమఖిలమ్ ।
ప్రసన్నస్తద్భక్త్యా త్యజసి కిల నాద్యాపి
భవనం బలేర్భక్తాధీన్యం తవ విదితమేవామరపతే ॥ ౯॥
సమాధావాసక్తం నృపతితనయైర్వీక్ష్య పితరం హతం
బాణై రోషాద్గురుతరముపాదాయ పరశుమ్ ।
వినా క్షత్రం విష్ణో క్షితితలమశేషం కృతవసోఽసకృత్కిం
భూభారోద్ధరణపటుతా తే న విదితా ॥ ౧౦॥
సమారాధ్యోమేశం త్రిభువనమిదం వాసవముఖం వశే
చక్రే చక్రిన్నగణయదనిశం జగదిదమ్ ।
గతోఽసౌ లఙ్కేశస్త్వచిరమథ తే బాణవిషయం
న కేనాప్తం త్వత్తః ఫలమవినయస్యాసురరిపో ॥ ౧౧॥
క్వచిద్దివ్యం శౌర్యం క్వచిదపి రణే కాపురుషతా
క్వచిద్గీతాజ్ఞానం క్వచిదపి పరస్త్రీవిహరణమ్ ।
క్వచిన్మృత్స్నాశిత్వం క్వచిదపి చ వైకుణ్ఠవిభవశ్చరిత్రం
తే నూనం శరణద విమోహాయ కుధియామ్ ॥ ౧౨॥
న హింస్యాదిత్యేద్ఘ్రువమవితథం వాక్యమబుధైరథాగ్నీషోమీయం
పశుమితి తు విప్రైర్నిగదితమ్ ।
తవైతన్నాస్థానేఽసురగణవిమోహాయ గదతః సమృద్ధిర్నీచానాం
నయకర హి దుఃఖాయ జగతః ॥ ౧౩॥
విభాగే వర్ణానాం నిగమనిచయే చావనితలే
విలుప్తే సఞ్జాతో ద్విజవరగృహే శమ్భలపురే ।
సమారుహ్యాశ్వం స్వం లసదసికరో
మ్లేఞ్చ్ఛనికరాన్నిహన్తాఽస్యున్మత్తాన్కిల కలియుగాన్తే యుగపతే ॥ ౧౪॥
గభీరే కాసారే జలచరవరాకృష్టచరణో రణేఽశక్తో
మజ్జన్నభయద జలేఽచిన్తయదసౌ ।
యదా నాగేన్ద్రస్త్వాం సపది పదపాశాదపగతో గతః
స్వర్గం స్థానం భవతి విపదాం తే కిము జనః ॥ ౧౫॥
సుతైః పృష్టో వేధాః ప్రతివచనదానేఽప్రభురసావథాత్మన్యాత్మానం
శరణమగమత్త్వాం త్రిజగతామ్ ।
తతస్తేఽస్తాతఙ్కా యయురథ ముదం హంసవపుషా
త్వయా తే సార్వజ్ఞం ప్రథితమమరేశేహ కిము నో ॥ ౧౬॥
సమావిద్ధో మాతుర్వచనవిశిఖైరాశు విపినం తపశ్చక్రే
గత్వా తవ పరమతోషాయ పరమమ్ ।
ధ్రువో లేభే దివ్యం పదమచలమల్పేఽపి వయసి
కిమస్త్యస్మిఁల్లోకే త్వయి వరద తుష్టే దురధిగమ్ ॥ ౧౭॥
వృకాద్భీతస్తూర్ణం స్వజనభయభిత్త్వాం
పశుపతిర్భ్రమఁల్లోకాన్సర్వాన్ శరణభుపయాతోఽథ దనుజః ।
స్వయం భస్మీభూతస్తవ వచనభఙ్గోద్గతమతీ
రమేశాహో మాయా తవ దురనుమేయాఽఖిలజనైః ।౧౮॥
హృతం దైత్యైర్ద్దష్ట్వాఽనృతఘటమజయ్యైస్తు నయతః కటాక్షైః
సంమోహం యువతివరవేషేణ దితిజాన్ ।
సమగ్రం పీయూషం సుభగ సురపూగాయ దదతః సమస్యాపి
ప్రాయస్తవ ఖలు హి భృత్యేష్వభిరతిః ॥ ౧౯॥
సమాకృష్టా దుష్టైర్దుపదతనయాఽలబ్ధశరణా సభాయాం
సర్వాత్మంస్తవ శరణముచ్చైరుపగతా ।
సమక్షం సర్వేషామభవదచిరం చీరనిచయః స్మృతేస్తే
సాఫల్యం నయనవిషయం నో కిము సతామ్ ॥ ౨౦॥
వదన్త్యేకే స్థానం తవ వరద వైకుణ్ఠమపరే
గవాం లోకం లోకం ఫణినిలయపాతాలమితరే ।
తథాన్యే క్షీరోదం హృదయనలినం చాపి తు సతాం న మన్యే
తత్స్థానం త్వహమిహ చ యత్రాసి న విభో ॥ ౨౧॥
శివోఽహం రుద్రాణామహమమరరాజో దివిషదాం మునీనాం
వ్యాసోఽహం సురవర సముద్రోఽస్మి సరసామ్ ।
కుబేరో యక్షాణామితి తవ వచో మన్దమతయే న
జానే తజ్జాతం జగతి నను యన్నాసి భగవన్ ॥ ౨౨॥
శిరో నాకో నేత్రే శశిదినకరావమ్బరమురో దిశః
శ్రోతే వాణీ నిగమనికరస్తే కటిరిలా ।
అకూపారో బస్తిశ్చరణమపి పాతాలమితి
వై స్వరూపం తేఽజ్ఞాత్వా నృతనుమవజానన్తి కుధియః ॥ ౨౩॥
శరీరం వైకుణ్ఠం హృదయనలినం వాససదనం మనోవృత్తిస్తార్క్ష్యో
మతిరియమథో సాగరసుతా ।
విహారస్తేఽవస్థాత్రితయమసవః పార్షదగణో న పశ్యత్యజ్ఞా
త్వామిహ బహిరహో యాతి జనతా ॥ ౨౪॥
సుఘోరం కాన్తారం విశతి చ తడాగం సుగహనం
తథోత్తుఙ్గం శృఙ్గం సపది చ సమారోహతి గిరేః ।
ప్రసూనార్థం చేతోమ్బుజమమలమేకం త్వయి విభో
సమర్ప్యాజ్ఞస్తూర్ణం వత న చ సుఖం విన్దతి జనః ॥ ౨౫॥
కృతైకాన్తావాసా విగతనిఖిలాశాః శమపరా
జితశ్వాసోచ్ఛ్వాసాస్త్రుటితభవపాశాః సుయమినః ।
పరం జ్యోతిః పశ్యన్త్యనఘ యది పశ్యన్తు మమ తు
శ్రియాశ్లిష్టం భూయాన్నయనవిషయం తే కిల వపుః ॥ ౨౬॥
కదా గఙ్గోత్తుఙ్గామలతరతరఙ్గాచ్ఛపులినే
వసన్నాశాపాశాదఖిలఖలదాశాద్ అపగతః ।
అయే లక్ష్మీకాన్తామ్బుజనయన తాతామరపతే
ప్రసీదేత్యాజల్పన్నమరవర నేష్యామి సమయమ్ ॥ ౨౭॥
కదా శృఙ్గైః స్ఫీతే మునిగణపరీతే హిమనగే ద్రుమావీతే
శీతే సురమధురగీతే ప్రతివసన్ ।
క్వచిద్ధ్యానాసక్తో విషయసువిరక్తో భవహరం
స్మరఁస్తే పాదాబ్జం జనిహర సమేష్యామి విలయమ్ ॥ ౨౮॥
సుధాపానం జ్ఞానం న చ విపులదానం న నిగమో
న యాగో నో యోగో న చ నిఖిలభోగోపరమణమ్ ।
జపో నో నో తీర్థం వ్రతమిహ న చోగ్రం త్వయి
తపో వినా భక్తిం తేఽలం భవభయవినాశాయ మధుహన్ ॥ ౨౯॥
నమః సర్వేష్టాయ శ్రుతిశిఖరదృష్టాయ చ నమో
నమోఽసంశ్లిష్టాయ త్రిభువననివిష్టాయ చ నమః ।
నమోవిస్పష్టాయ ప్రణవపరిమృష్టాయ చ నమో
నమస్తే సర్వాత్మన్పునరపి పునస్తే మమ నమః ॥ ౩౦॥
కణాన్కశ్చిద్వృష్టేర్గణననిపుణస్తూర్ణమవనేస్తథా-
శేషాన్పాంసూనమిత కలయేచ్చాపి తు జనః ।
నభః పిణ్డీకుర్యాదశిరమపి చేచ్చర్మవదిదం
తథాపీశాసౌ తే కలయితుమలం నాఖిలగుణాన్ ॥ ౩౧॥
క్వ మాహాత్మ్యం సీమోజ్ఝితమవిషయం వేదవచసాం విభో
తే మే చేతః క్వ చ వివిధతాపాహతమిదమ్ ।
మయేదం యత్కిఞ్చిద్గదితమథ బాల్యేన తు గురో
గృహాణైతచ్ఛుద్ధార్పితమిహ న హేయం హి మహతామ్ ॥ ౩౨॥
ఇతి హరిస్తవనం సుమనోహరం పరమహంసజనేన సమీరితమ్ ।
సుగమసున్దరసారపదాస్పదం తదిదమస్తు హరేరనిశం ముదే ॥ ౩౩॥
గదారథాఙ్గామ్బుజకమ్బుధారిణో రమాసమాశ్లిష్టతనోస్తనోతు నః ।
బిలేశయాధీశశరీరశాయినః శివం స్తవోఽస్రమయం పరం హరేః ॥ ౩౪॥
పఠేదిమం యస్తు నరః పరం స్తవం సమాహితోఘౌఘఘనప్రభఞ్జనమ్ ।
స విన్దతేఽత్రాఖిలభోగసమ్పదో మహీయతే విష్ణుపదే తతో ధ్రువమ్ ॥ ౩౫॥
। ఇతి శ్రీమత్పరమహంసస్వామిబ్రహ్మానన్దవిరచితం
శ్రీవిష్ణుమహిమ్నః స్తోత్రం సమ్పూర్ణమ్ ।
About
https://vaidikagrandhanidhi.blogspot.com/
This is a short description in the author block about the author. You edit it by entering text in the "Biographical Info" field in the user admin panel.
Blogger Comment
Facebook Comment